坦白講，我自己都好耐冇試過慳錢及儲錢，對上一次係五年前，公司為咗轉型，由廣告Agency變成網購公司。因為開始做網購公司時，我以為需要好似傳統零售貿易咁樣準備現金買現貨；以及當時已經知道需要準備信用卡，應付Facebook買廣告，所以有一段時間，自己有一種「地獄式慳錢法」嘅自律，維持左大概一年時間。
我當時嘅消費習慣如下：第一、盡量唔用信用卡消費，因為咁樣影響我喺Facebook買廣告。第二、將「想要」同埋「需要」嘅消費分開，「想要」嘅消費唔會即時購買。三、鍛鍊自己刪除「不必要」嘅消費習慣。
而我最想分享嘅係如何分別「想要」及「需要」。想要對我來講係一種慾望，係短暫而唔長久嘅；需要對我來講係一種執着，例如有自己事業嘅執着，呢種執着係短期痛苦，但長期係會不斷為我帶來自動收入。自從呢次鍛練之後，每逢出入返公司call uber 係我嘅「需要」，因為我知道人擁有專注力嘅時間係有限，我執着喺辦公室做決策嘅時間係一種「需要」；而我投放喺Facebook 廣告嘅金錢亦都係一種「需要」。我喺2019年投放喺Facebook嘅廣告相信有10,000,000 ，呢個10,000,000唔係白白花費左，而係我累積掌握到Facebook AI 派廣告演算法pattern，從而幫助我喺網上落廣告更加精準、更加快速。
人最難莫過於係選擇，如何區分「想要」及「需要」每個人嘅價值觀會唔同，但重要嘅事情係需要選擇及取捨。以及早辨清想要及需要亦都可以幫助你減少人生嘅痛苦。
