好多第一次

這幾天經歷過好多第一次：第一次公司停止運作三天，第一次喺屋企直播教學，連家中嘅小朋友都好好奇我做緊乜：「原來爸爸真係做YouTuber😅」

話說我做網購創業導師其實心裏同其他學員一樣有個掙扎，就係唔想出樣😅😅。我嘅轉變其實係一次我同我家中嘅小朋友對話啟發左我：

「你將來嘅志願係咩呀？」我問
「唔講啦，你實笑我」
「我唔笑你啦，你講啦」
「我好鍾意笑波子，我想做Youtuber」

其實佢哋做咩工作我都唔會反對，但係佢講想做Youtuber，我就真係有3秒係比唔到反應。

 「我唔笑你，既然決定咗，就要好好做好佢，不如而家你搵個題目試吓做囉？我見佢哋都係做下打機直播，或者講下平時養吓狗嘅趣事，好容易姐！」我話。

「你以為好容易，學校又冇教我點做，咁叻你試吓做？唔係咁易㗎 ！」

就係咁，我做直播導師嘅工作，就係同我小朋友嘅少少承諾作為開始。因為我心中有個信念：未來其實屬於小朋友及下一代，如果我哋呢一代都唔勇於作出改變，個社會就真係冇得救。

呢代人可以比喻為上咗浮台嘅人

我哋呢代人可以比喻為上咗浮台嘅人，但係海中仲有好多下一代年青人仍然繼續掙扎游緊埋浮台。喺浮台嘅人當然可以指指點點佢哋游得唔夠好，甚至唔想比佢哋游埋浮台搶走你嘅資源⋯但係佢哋可能忘記咗佢哋曾經都做過年青人，曾經都努力掙扎過係海中游去浮台，如果當初嘅你有人係海中扶持你、教導下你，相信你都能夠游得快啲、舒服啲；而喺浮台裏面嘅人舒服得太耐亦都會令自己同社會脫節，慢慢變得眼光狹窄沉於安逸。而我嘅信念係：分享網購創業教學既可以幫助到社會有需要嘅人之餘，亦鞭策到我自己勇於再次跳落海中，游去一個更大嘅浮台。

其實直播教學係我工作生涯之中暫時係付出最多但收穫最少。但因為遙距教學係新經濟下係一個大趨勢，無論個人、企業都係時候思考呢種新嘅工作模式。係呢幾日社會動盪下仍然有不少學員鼓勵我繼續直播教學，講真我真係好感動，無論幾困難、幾嘥時間我都嘗試喺家中、coffee shop做直播教學，直至所有學員都貫徹明白我網購教學精髓為止。

 大家緊記，羅馬非一日建成，縱使沙堡壘都要有千千萬萬嘅細砂先可以構成。直播教學到而家為止我好感激同事與我嘅配合，因為冇你哋建議我用一啲遙距軟件工具例如Trello, Zoom等等，就算我嘅教學內容幾咁簡單易明，都冇辦法令大家學員可以安在家中睇到我嘅直播!