恐懼係一個正面嘅訊息

「啲客認得你。」我上星期六去剪頭髮，間Salon都算幾多人。剪剪吓頭髮，髮型師笑住咁同我講咗呢句說話。

閒談之間，髮型師問我可唔可以幫佢諗吓點做好網上宣傳，我話更係無問題啦。

我俾咗啲意見佢，點樣經營好 Facebook & IG，佢都點曬頭，好有興趣。

ME :「但髮型師一定要出樣㗎喎！」

一聽到呢句，佢即刻耍手擰頭🙅🏻‍♂️ 「唔得呀… 我唔想出樣呀，我驚呀…」

最後件事就不了了之…

回想起六年前，我啱啱開始做網店導師嘅時候，都好怕出樣。做咗一段時間都未係好適應到…

一開始面對「有人認得你」呢種情況，我都會恐懼… 我覺得自己又唔係明星，只係一個普通人，被陌生人認得出同討論，其實都幾驚同尷尬🙈

當然，隨著時間同經驗嘅累積，我而家已經唔再怕出樣啦。

但我目前又有一個好大嘅恐懼… 「KEN Sir最近有咩爆品呀？」凡親我係街、公司都不斷收到學員嘅詢問。我恐懼唔係我答唔到佢，而係學員必須明白自己必須從「蛋殼」裏面孵化出嚟…我恐懼係因為我未能夠為我學員答一個令佢哋即時滿意嘅答案。

點解恐懼不斷纏繞係我哋人生身上？

我回想起學員E，樣貌非常年青，但分析數據好老手feel。從數據去判斷一個廣告同產品好唔好，完全難佢唔到。但講到做內容同出樣，佢就最恐懼。

我近排成日都強調，做產品直播係一個大趨勢。佢都好明白呢個道理，但就係行唔出第一步。

我嘗試去鼓勵學員E : 「不如你由拍片開始，平時啲產品介紹影片都出吓樣，當練習。咁做直播嘅時候就無咁驚啦！」

🤦🏻‍♀️「吓！？要我出樣？咪玩啦，好尷尬… 」佢好抗拒。

於是，我講咗一個故事俾佢聽。

「容祖兒，一線嘅天后級歌手，其實同你同我一樣，都面對過出樣呢個恐懼。佢十九歲啱啱出道嘅時候，其實都好驚面對群眾。每次出Live Show佢都好緊張。而家嘅佢已經好有自信，演唱會搞氣氛嗰啲完全難佢唔到。」

學員E一邊聽一邊點頭，明顯佢活係同我同一年代，我繼續講。

作為一位歌手想變成一線嘅歌手。佢一定要克服出live嘅恐懼。當時，容祖兒嘅老闆楊受成，就同佢講咗一番說話 : 「你嘅恐懼越大，即係代表嗰個目標更加值得你去爭取。恐懼唔係一個感覺，係一個選擇；你恐懼，代表你放棄爭取你面前爭取嘅目標。」

聽完呢個故事之後，佢靜咗幾秒。之後，佢用一個堅定嘅眼神，鼓起勇氣同我講 : 「好，KEN Sir，我應承你，我會選擇去出樣拍片。」

事實證明佢嘅選擇係正確。短時間內，佢嘅網店由100 page like，短時間內晉升到800 page like，單量比之前多咗好幾倍，最近亦有信心籌備出Live

我覺得我同學員之間嘅角色，就好似經理人同歌手，又或者母雞同雞蛋一樣。好多事情一開始，都要由佢哋自己嘗試去衝破個雞蛋殼。我當然都會好擔心佢哋能唔能夠孵化成功，但如果你連個雞蛋殼都唔嘗試去衝破，我都好難幫到你行第一步。

恐懼代表你已經有清晰目標，但欠缺行動；衝破雞蛋殼就等於衝破你嘅恐懼。克服到恐懼，其實你已經對得住你自己。結局係點，往往係出人意表。